the Peterborough Chronicle second continuation 1154
in a normalised Early Middle English (East Midland dialect c 1200)
view original text1154
On þis ᵹær warþ þe king Stephne dæd & bebiried þær. His wíf & his sune wæren bebiried at Fauresfeld, þat minster hí makeden. Þá þe king was dæd, þá was þe erl beᵹonde sæ, & ne durste nán man dón tó óþer búte gód for þe micel eᵹe of him. Þá hé tó Engleland cóm, þá was hé underfangen mid micel wurþscipe, & tó king bletsed in Lundene on þe Sunnendaᵹ beforen midwinterdaᵹ; & héld þær micel curt. Þat ilke daᵹ þat Martin abbot of Burh sculde þider faren, þá séclede hé & warþ dæd iv Nonae Ianuarii.
& þe munekes inne daᵹes chusen óþer of hem self. Willelm de Waltevile is iháten - gód clerk & gód man; & wel lufed of þe kinge & of alle góde men. & on circe birieden þe abbot héhlíce; & sóne þe chosen abbot férde & þe munekes mid him tó Oxenforde tó þe king & hé ᵹaf him þat abbotríce. & hé férde him sóne tó Lincol & was þær bletsed tó abbot ær hé hám cóme. & siþen was underfangen mid micel wurþscipe at Burh, mid micel processiun. & swá hé was alswá at Rameseᵹe, & at Torn, & at Spall & at Sancte Ibres, & nú is abbot; & faᵹre hafeþ begunnen. Crístes him unne þus enden!